Огаҳӣ доир ба хатари савдои одамон аз саҳнаи театр

ДУШАНБЕ, 28.03.2017/АМИТ «Ховар»/. Садҳо сокинони шаҳри Истаравшан огаҳии худро доир ба хатарҳои савдои одамон аз як намоишномаи театрӣ, ки 28 марти соли ҷорӣ аз ҷониби ҳунарманди шинохтаи Ҷумҳурии Тоҷикистон Аловуддин Абдуллоев ва гурӯҳи ӯ таҳия шудааст, боло мебаранд. Дар ин хусус ба АМИТ «Ховар» аз намояндагии Созмони Байналмилалии Муҳоҷират /СБМ/дар Ҷумҳурии Тоҷикистон иттилоъ доданд.
Силсилаи намоишномаҳои театрӣ дар доираи Лоиҳаи USAID оид ба шаъну эътибор ва ҳуқуқ баргузор мегардад. Лоиҳаи мазкурро СБМ амалӣ менамояд.
Намоишнома мушкилоти мубрами марбут ба савдои одамонро инъикос намуда, тамошобинонро аз хатарҳо огоҳ мекунад ва доир ба роҳҳои ҳифзи худ ва оилаву дӯстон аз занҷираҳои макри ҷинояткорон маълумот медиҳад.
Қаҳрамонони намоишнома ҷавонону бонувон мебошанд, зеро онҳо доир ба шароити кору зиндагӣ ва қонунҳои кишварҳои хориҷӣ, ки барои кор мераванд, маълумоти кофӣ надоранд, ҳуқуқҳои худро намедонанд ва худро қонунан ҳимоя карда наметавонанд. Аз ин рӯ, онҳо осебпазир буда, дар баъзе мавридҳо ба доми ҳиллаву найранги ҷинояткорон меафтанд ва истисмор мегарданд.
Чунин намоишномаҳои театрӣ қаблан аз ҷониби намояндагии СБМ дар Ҷумҳурии Тоҷикистон дар дигар минтақаҳои ҷумҳурӣ ба намоиш гузошта шуда буданд.