Сокинони ноҳияи Рӯдакӣ бо гумони додани пора ба кормандони милитсия дастгир гардиданд

ДУШАНБЕ, 13.03.2017. /АМИТ «Ховар»/. Дар натиҷаи гузаронидани тадбирҳои фаврӣ-ҷустуҷӯӣ се нафар марди 25, 50 ва 58-солаи сокинони ноҳияи Рӯдакӣ бо гумони додани пора ба кормандони милитсия дастгир гардиданд. Дар ин бора аз Вазорати корҳои дохилии Ҷумҳурии Тоҷикистон хабар доданд.
Гумонбаршудагон барои аз ҷавобгарии ҷиноятӣ озод кардани пешдастгиршудагон- марди 53 ва ҷавони 22-солаи сокинони ноҳияи Рӯдакӣ, ки барои содир намудани ҷинояти вазнин гумонбар мешаванд, ба кормандони Раёсати Вазорати корҳои дохилӣ дар шаҳри Душанбе ба миқдори 7 ҳазору 480 доллари амрикоӣ, 60 ҳазору 700 сомонӣ ва 10 ҳазор рубли русиро ҳамчун пора пешниҳод намудаанд. Аз гумонбаршудагон далелҳои шайъӣ гирифта шуданд.
Вобаста ба ҳодисаи мазкур парвандаи ҷиноятӣ оғоз гардида, корҳои тафтишотӣ идома доранд.