Ҳайвоноти ваҳшӣ дар ҷустуҷӯи ғизо аз қуллаи кӯҳҳои Помир ба маҳалҳои аҳолинишин фаромаданд

ХОРУҒ, 27.04.2017. /АМИТ «Ховар»/. Боришоти пай дар паи зимистони имсола барои парандагону ҳайвоноти ваҳшӣ низ мушкилоти зиёд ба бор овард. Дар Бадахшон барфи ғафс ҳанӯз ҳам заминро пӯшонидааст ва ҳайвонот ба буттаву алафи кӯҳӣ дастрасӣ надоранд, бинобарин иҷборан ба деҳоти назди кӯҳдоманҳо рӯ меоранд.

Сардори Раёсати ҳифзи муҳити зисти вилояти Мухтори Кӯҳистони Бадахшон Мулкамон Назаралиев ба хабарнигори АМИТ «Ховар» гуфт, ки «мутахассисони мо дар ҳамкорӣ бо мудирияти Боғи миллии Тоҷикистон, мамнӯъгоҳи «Зоркӯл», Ассотсиатсияи шикорчиён ва волонтёрон аз моҳи январи соли равон корҳои биотехникиро оғоз карданд ва ба иллати ғафсии барфу сардии ҳаво то ҳол ин маъракаро идома медиҳанд. Айни ҳол дар нуқтаҳои ҷамъшавии ҳайвонот зиёда аз 5 тонна хӯроки чорво, 300 килограмм намак захира карда шудааст.  Ҳодисаҳои ба маҳалҳои аҳолинишин  фаромадани бузи кӯҳӣ ва гӯсфанди Марко Поло дар деҳоти Пастхуфи ноҳияи Рӯшон, деҳаи Бунии ноҳияи Шуғнон, деҳаи Оқҷари ноҳияи Мурғоб ба  мушоҳида расид».

Ба иттилои ҳамсуҳбат, мутахассисони Раёсати ҳифзи муҳити зисти вилоят  галаи гӯсфандони Марко Поло ва бузи кӯҳиро   боз ба кӯҳҳо «гусел намуда», чанд тонна алафро низ дар доманакӯҳҳо партофтанд.

Аксарияти ҳайвоноти нодир, ба мисли гӯсфанди Марко Поло ва бузи кӯҳии сибирӣ дар ноҳияи Мурғоб, ки шомили Боғи миллии Тоҷикистон буда, масоҳати он 1 миллиону 487 гектар мебошад, ба қайд гирифта шудаанд.