АМИТ «Ховар» озмуни «Пайки Наврӯз»-ро ҷамъбаст намуд

ДУШАНБЕ, 07.04.2017 /АМИТ «Ховар»/. Озмуни «Пайки наврӯз», ки онро Агентии миллии иттилоотии Тоҷикистон «Ховар» бахшида ба Иди байналмилалии Наврӯз барои беҳтарин хабар, гузориш ва мусоҳиба эълон намуда буд, ҷамъбаст гардид.
Дар озмуни мазкур ба унвони Агентӣ аз ҷониби рӯзноманигорон, олимон ва шахсони касбу кори гуногун маводи ҷолибу пурмазмун пешниҳод шуданд.
Аз рӯи баҳогузории ҳакамон ҷои аввал ба касе муносиб дониста нашуд. Ғолиби ҷои дуюм хабарнигори нашрияи «Ҷумҳурият» Ташрифулло Саъдуллоев барои мақолаи «Чаро Бобои Наврӯз набошад, то аз баҳори файзбахш муждагонӣ орад?» дониста шуд. Бурҳониддин Каримзода, хабарнигори рӯзномаи «Садои мардум» барои мақолаи «НАВРӮЗ-САРИ СОЛ: шояд вақте фаро мерасад, ки дар тамоми дунё Соли навро дар оғози баҳор таҷлил мекунанд» ва мухбири Агентии миллии иттилоотии Тоҷикистон «Ховар» Шукӯҳ Бозоров барои мусоҳиба бо фолклоршинос Дилшод Раҳимов «Наврӯз ҷашни фарҳангӣ ва сулҳофар аст ва ба дину оин рабте надорад» сазовори ҷои сеюм гардиданд.
Бояд гуфт, ки Наврӯз аз муборактарин ҷашнҳои миллии мо тоҷикон ва дигар мардумони ҳавзаи Наврӯз аст, ки аз замонҳои қадим то ба имрӯз бо ғояҳои олии башардӯстона — дӯстиву ҳамкорӣ, созандагиву ободкорӣ, инсондӯстиву хайрхоҳӣ ва шукргузорӣ аз зебоиву неъматҳои табиат мардумро гирди ҳам меорад.
Ҳадаф аз эълони озмуни «Пайки Наврӯз» бори дигар арҷгузорӣ аз таҷлили ҷашни Наврӯзи Аҷам ва шинос намудани мардуми ҷаҳон бо мероси фарҳангии мардуми тоҷик мебошад.