«Авангард» ҷавононро ба ҷасурию пешоҳангӣ даъват мекунад

ДУШАНБЕ, 27.04.2017 /АМИТ «Ховар»/. Хадамоти пешгирии ҳуқуқвайронкунӣ байни ноболиғон ва ҷавонони Вазорати корҳои дохилии Ҷумҳурии Тоҷикистон ва гурӯҳи ҷавонони «Авангард» бо намояндагони муҳассилини муассисаҳои олии таълимии шаҳри Душанбе мулоқот доир намуданд.
Тавре аз Вазорати корҳои дохилии ҶТ иттилоъ доданд, зимни вохӯрӣ масъалаҳои тарбия, ташаккул ва камолоти донишҷӯён, пешгирии ҷинояткорӣ ва ҳуқуқвайронкунӣ, шомилшавӣ ба ҳизбу ҳаракатҳои экстремистӣ ва равияҳои бегона, тарбияи ҷавонон дар рӯҳияи ватандӯстиву хештаншиносӣ баррасӣ шуданд.
Намояндагони «Авангард» ҳамсолони худро аз вазъияти имрӯзаи ҷаҳон огоҳ сохта, онҳоро ба ватандӯстӣ ва пешгирии ҳама гуна амалҳои ғайриқонунӣ даъват намуданд.
Ҳадафи чунин вохӯриҳо иҷрои дастуру супоришҳои Президенти Ҷумҳурии Тоҷикистон ва талаботи қонунҳои Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» ва «Дар бораи таҳсилоти олии касбӣ ва таҳсилоти касбии баъд аз хатми муассисаҳои олии таълимӣ» мебошад.