Ба сокинони ноҳияи Варзоб расмикунонии будубоши муҳоҷирон, касбомӯзӣ ва имтиёзҳои шахсони бекор фаҳмонида шуд

ДУШАНБЕ, 21.04.2017 /АМИТ «Ховар»/. Дар Ҷамоати шаҳраки Такоби ноҳияи Варзоб бо иштироки сокинони ҷамоат оид ба расмикунонии будубоши мухоҷирони меҳнатӣ-шаҳрвандони Ҷумҳурии Тоҷикистон дар Федератсияи Россия ва рушди соҳибкорӣ, касбомӯзӣ ва имтиёзҳои шахсони бекор ҳамоиш баргузор гардид. Дар ин бора аз Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон хабар доданд.
Ҳамчунин дар вохӯрӣ оид ба рушди ҳунарҳои мардумӣ дар ноҳия, татбиқи Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон», беҳдошти ҳолати санитарӣ ва ҳифзи табиат аз ифлосшавӣ, пешгирии бемориҳои сироятӣ, инчунин пешгирии гароиши аҳолӣ ба гурӯҳҳои ифротгаро ва терроризм сухан рафт.
Ҳамчунин ба таваҷҷуҳи шаҳрвандони ноҳия расонида шуд, ки тибқи қарори Вазорати корҳои дохилии Федератсияи Россия дар муҳлати як моҳ- аз 25 март то 24 апрели соли равон дар тамоми қаламрави Федератсияи Россия барои шаҳрвандони Ҷумҳурии Тоҷикистон ҷиҳати расмикунонии истиқомат тавассути бақайдгузорӣ дар мақомоти муҳоҷират ва тамдиди муҳлати будубош имконият дода мешавад.
Аз муҳоҷирони меҳнатӣ- сокинони ноҳия хоҳиш карда шуд, ки барои гирифтани маълумоти дақиқ пеш аз сафар барои кор ба Федератсияи Россия ба Бахши Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар ноҳияи Варзоб муроҷиат намоянд.