Бонувони шаҳритусӣ ба бофтани адрасу атлас шурӯъ карданд

ДУШАНБЕ, 21.04.2017. /АМИТ «Ховар»/. Гурӯҳе аз бонувони ноҳияи Шаҳритус пас аз хатми давраи омӯзишӣ ба бофтани адрасу атлас оғоз карданд.
Бино ба иттилои корманди шуъбаи иттилоотию таҳлилии дастгоҳи раиси вилояти Хатлон, занони ҳунарманд азм доранд, ки маҳсули дасташонро ба бозорҳои кишвар ба фурӯш бароранд.
Дар заминаи ҶДММ «Дук», ки яке аз корхонаҳои саноатии ноҳияи Шаҳритус мебошад, бофтани адрас ба роҳ монда шудааст. Ба гуфти сарвари ин корхона Додарбек Мунавваров, дар корхона беш аз 40 нафар ҷавондухтарони ноҳия кор мекунанд. «Дук» аз соли 2014 ба коркарди ашёи хоми пилла машғул буда, ҳар сол зиёда 23 тонна ашёи хоми пилларо ба хориҷи кишвар содир мекунад.
«Имсол бо мақсади ҳифзи ҳунарҳои қадимаи тоҷикӣ маъмурияти корхона як сехи адрасбофӣ кушод, ки дар он зиёда аз 20 нафар занону духтарон бо ҷойи кори доимӣ таъмин гардиданд», — зикр кард Д. Мунавваров.