Бошандагони деҳаи Сомғори ноҳияи Спитамен бо оби тозаи нӯшокӣ таъмин гардиданд

ДУШАНБЕ, 15.04.2017. /АМИТ «Ховар»/. Чанд сол инҷониб мардуми деҳаи Сомғори ҷамоати деҳоти Турсун Улҷабоеви ноҳияи Спитамен аз оби тозаи нӯшокӣ танқисӣ мекашиданд. Инак  бо дастгирии Мақомоти иҷроияи ҳокимияти давлатии ноҳияи Спитамен, Муассисаи давлатии корхонаи фаръии «Тоҷикобдеҳот»-и  ноҳияи Спитамен  дар ҳамкорӣ бо аҳли ин деҳа зиёда аз 2 километр қубурҳои фарсудашудаи хатти оби нӯшокиро   таъмиру нав карда, сокинони ин маҳалро бо оби тозаи нӯшокӣ таъмин намуданд.

Ҳамчунин обанбори ин деҳа, ки аз он имрӯз мардум бо оби нӯшокӣ таъмин мешаванд, низ таъмир карда шуд ва дар он 250 мукааб оби тоза захира карда мешавад.

Мардум аз ин иқдоми роҳбарияти Мақомоти иҷроияи ҳокимияти давлатии ноҳия ва корхонаи фаръии «Тоҷикобдеҳот»-и ноҳия хушнуд гардида, барои чунин иқдоми наҷиб изҳори сипосмандӣ менамоянд.