Боздошти сокини шаҳри Душанбе бо гумони дуздии тилловорӣ дар ҳаҷми $25 ҳазор

ДУШАНБЕ, 26.04.2017. /АМИТ «Ховар»/. Дар натиҷаи гузаронидани корҳои фаврӣ-ҷустуҷӯӣ аз ҷониби кормандони милитсия марди 23-солаи сокини шаҳри Душанбе, ки қаблан суд шудааст, бо гумони такроран содир намудани ҷинояти дуздӣ дастгир карда шуд.
Тавре аз Вазорати корҳои дохилии Ҷумҳурии Тоҷикистон хабар доданд, марди гумонбаршуда, ки ҷазои қаблиаш ба ӯ сабақ нагардидааст, 13 ноябри соли 2016, тахминан соати 14:50 бо роҳи пинҳонӣ аз манзили истиқоматии зани 23-солаи сокини шаҳри Душанбе ба маблағи 15 ҳазор доллари амрикоӣ ҷавоҳироти тиллоиро дуздида, аз ҷойи ҳодиса ғайб задааст. Ҳамчунин гумонбаршуда бо ҳамин роҳ аз хонаи истиқоматии зани 60-солаи сокини шаҳри Душанбе дар ҳаҷми 10 ҳазор доллари амрикоӣ тилловориро ба яғмо бурдааст.
Ба иттилои манбаъ, нисбат ба дастгиршуда парвандаи ҷиноятӣ оғоз гардида, корҳои тафтишотӣ идома доранд.