Дар Файзобод ба ёдбуди шаҳидони садамаҳои радиатсионӣ конференсияи ҷумҳуриявӣ доир гардид

ФАЙЗОБОД, 26.04.2017. /АМИТ «Ховар»/. Имрӯз дар  ноҳияи Файзобод  бахшида ба 31–умин солгарди Рӯзи байналхалқии ёдбуди шаҳидони садамаҳои радиатсионӣ конференсияи ҷумҳуриявии  ташкилоти ҷамъиятии  «Итифоқи маъюбони  Чернобил»–и  Ҷумҳурии Тоҷикистон  баргузор шуд. Дар конференсия намояндагони Ҳукумати Ҷумҳурии Тоҷикистон, сафирони фавқулодаи Федератсияи Россия, ҷумҳуриҳои Украина ва Беларус дар Тоҷикистон, раиси Шӯрои собиқадорони ҷангу меҳнати Ҷумҳурии Тоҷикистон, раиси Кумитаи кор бо интернатсионалистони Ҷумҳурии Тоҷикистон ва 159 нафар вакилони конференсияи ҷумҳуриявии  Ташкилоти ҷамъиятии  чернобилчиён аз Вилояти Мухтори Кӯҳистони Бадахшон, вилоятҳои Суғду Хатлон ва шаҳру навоҳии тебеи ҷумҳурӣ иштирок намуданд.

Дар конференсия раиси ноҳияи Файзобод Миралӣ Раҷабзода иброз намуд, ки «таъсири фоҷиабори садамаҳои радиатсиониву атомӣ сокинони сайёраи заминро бетараф намегузорад. Бо ин мақсад бо қарори Созмони Милали Муттаҳид 26 апрел ҳамчун Рӯзи байналмилалии ёдбуди шаҳидони  садамаҳои радиатсонӣ эълон гардидааст. Пешвои миллат муҳтарам Эмомалӣ Раҳмон ва Ҳукумати ҷумҳурӣ нисбат ба ин масъала бетараф набуда, баҳри таҳкими инсондӯстиву адолат ва пойдории гуманизм дар сайёра талош намуда, дар ин самт пайваста тадбирҳои заруриро амалӣ менамоянд. Далели ин гуфтаҳо Қонуни Ҷумҳурии Тоҷикистон «Дар бораи иштирокчиёни садамаи Чернобил» аст, ки соли 2007 қабул гардид».

Зикр гардид, ки аз соли 2007 инҷониб дар ҷумҳурӣ ташкилоти ҷамъиятии «Иттифоқи маъюбони Чернобил» амал мекунад, ки дар ҳайати он ташкилотҳои вилоятӣ, минтақавӣ, шаҳрӣ ва ноҳиявӣ дар тамоми манотиқи кишвар фаъолият доранд. Иштирокчиёни бартарафсозии оқибатҳои садамаи мазкур пайваста таҳти ҳимояи давлату ҳукумати кишвар қарор доранд.  Имрӯз ҳукумати кишвар барои маъюбон ва иштирокчиёни садамаи мазкур имтиёзҳои зиёдеро муҳайё намуда, ки онҳо метавонанд аз он истифода намоянд.

Дар конференсия ба иштирокчиёни садамаи Чернобил сипоснома ва туҳфаҳои хотиравӣ супориданд.