Дар Файзобод хотираи неки муаллифи сурудҳои «Гулбарги рӯи ман» ва «Шаршараи мӯи ту»-ро ёд карданд

ФАЙЗОБОД, 20.04.2017. /АМИТ «Ховар»/. Дирӯз дар қасри  фарҳанги  ноҳияи Файзобод  ба хотираи неки Ҳофизи халқии Тоҷикистон Дӯстмурод Алиев маҳфили ёдбуд доир гардид. Дар он ҳунармандон, ёру дӯстон ва мухлисони шодравон аз гӯшаю канори ҷумҳурӣ иштирок намуданд. Дар ин бора ба хабарнигори АМИТ «Ховар» аз шуъбаи фарҳанги ноҳияи Файзобод иттилоъ доданд.
Дар маҳфили мазкур Дӯстмуродхонҳои ноҳияи Файзобод ва ҷумҳурӣ зиёда аз 20 суруди ин ҳунарманди зиндаёдро сароиданд.

Ҳамчунин шогирдони Мактаби мусиқии ноҳия ба номи Дӯстмурод Алиев бо ҳунарнамоии хеш хотири меҳмононро болида гардониданд.

Ёдовар мешавем, ки шодравон Дӯстмурод Алиев муаллифи як силсила сурудҳои марғубу дилнишин, аз ҷумла «Гулбарги рӯи ман», «Шаршараи мӯи ту», «Оғози ишқ», «Чаро шабҳо нишинам», «Чашми тоҷик», «Моҳи Файзобод» ва чандин сурудҳои дигар буд, ки то кунун аз ёди ҳаводорони таронаҳояш нарафтаанд.