Дар Хатлон маводи дорувории муҳлати истифодааш гузашта нобуд карда шуд

ДУШАНБЕ, 15.04.2017 /АМИТ «Ховар»/. 27 ҳазору 691 адад маводи дорувории муҳлати истифодаашон гузаштаю бе сертификати мутобиқат, ки беш аз 207 номгӯйро ташкил медоданд, дар вилояти Хатлон нобуд гардид.
Тавре аз Раёсати Хадамоти давлатии фаъолияти фармасевтӣ дар вилояти Хатлон хабар доданд, 13 апрел дар ҳузури комиссияи салоҳиятнок ва намояндагони ВАО ин маводи дорувории муҳлати истифодаашон гузашта нобуд карда шуданд.
Маҳмадҷон Абдулқодирзода, сардори Раёсати назорати давлатии фаъолияти фармасевтӣ дар вилояти Хатлон пеш аз нобудкунии маводи доруворӣ, молҳои тиббӣ ва маводи ороишию гигиенӣ изҳор дошт, ки аз ҷамъи умумии мавод 149 номгӯй ё 26 ҳазору 584 ададашро маводи доруворӣ ва молҳои тиббии муҳлати истифодаашон гузашта, 58 номгӯй ба миқдори 1 ҳазору 107 адади дигарашро маводи доруворӣ ва молҳои тиббии бе сертификати мутобиқат ташкил медиҳанд.
«106 номгӯй ё 21 ҳазору 600 адади ин маводро ду ширкати фармасевтӣ ва 8 муассисаи табобатию пешгирӣ бо мактуб барои безарар нобуд намудан ба раёсат супурдаанд. Боқӣ 101 номгӯйи дигарро мутахассисони раёсат зимни санҷишҳои муассисаҳои фармасевтӣ ва табобатию пешгирӣ аз муомилот гирифтаанд»,-иброз дошт сардори раёсат.
Дар семоҳаи аввали соли равон мутахассисони раёсат нисбат ба 30 нафар шахсони масъул санади маъмурӣ тартиб дода, онҳоро ба маблағи умумии 58 ҳазору 750 сомонӣ ҷаримабандӣ карданд.