Дар мавзеи Роғаки ноҳияи Дарвоз, ки иқлими субтропикӣ дорад, лимӯпарварӣ босуръат рушд мекунад

ХОРУҒ, 28.04.2017. /АМИТ«Ховар»/. Деҳаи Роғаки ҷамоати Нулванди ноҳияи Дарвоз бо обу ҳаво ва иқлими худ нисбат ба дигар ноҳияҳои вилояти Мухтори Кӯҳистони Бадахшон комилан фарқ дорад. Танҳо боғдорони ҳамин мавзеъ имкон доранд, ки ниҳолҳои субтропикие, чун лимӯ, анҷиру анори босифатро парвариш  ва ба фурӯш гузоранд. Раиси ин ҷамоат Аловуддин Афғонов гуфт, ки «маҳсулоти кишоварзони деҳа на танҳо дар бозорҳои кишвар харидорони зиёд дорад, балки дар  чанд соли охир хориҷ аз кишвар низ талабот ба маҳсулоти онҳо афзудааст. Онҳо аз ин ҳисоб ҳамасола даромади хуб ба даст меоранд. Аз ин рӯ таваҷҷуҳашон ба парвариши меваҳои субтропикӣ, махсусан лимӯпарварӣ бештар мешавад».

Ҳоло дар мавзеи Роғак 32 лимӯхона мавҷуд буда, хоҷагии махсуси лимӯпарварӣ низ таъсис ёфт.

Ҳамчунин иддае аз сокинони деҳа дар 14 гектар замин боғҳои анору анҷир бунёд намудаанд. Яке аз сабабҳои афзоиши теъдоди харидорон он аст, ки боғдорони ин мавзеъ ҳаргиз аз моддаҳои кимиёӣ истифода намебаранд. Рушди соҳаи чорводорӣ ба онҳо имконият додааст, ки бештар аз моддаҳои органикӣ истифода баранд.