Дар назди обҳои шифобахши Ҷелондеҳи ноҳияи Шуғнон гармхонаҳо бунёд мешаванд

ХОРУҒ, 19.04.2017/. (АМИТ«Ховар»/. Оби шифобахши деҳаи Ҷелондеҳ бо хусусиятҳои шифобахшии худ берун аз кишвар низ маъруф аст. Ҳамасола ба ин чашмаҳои шифобахш садҳо нафар аз беморон, ки ба касалии миён, дарди дасту по, меъда ва рӯда мубталоянд, барои табобат меоянд. Дар замони истиқлолият дар ин макон ошхонаву меҳмонхонаҳо ва ҳавзҳои замонавӣ бунёд гардида, барои онҳое, ки мақсади дамгирӣ  доранд, хатҳои сайр таҳия шудаанд ва як гурӯҳи роҳбаладон дар хизмати онҳо мебошанд.

Аммо ҳоло ин чашмаҳои шифобахш на танҳо ба дарди ниёзмандон даво мебахшанд, балки онҳоро бо сабзавоти тару тоза низ таъмин мекунанд. Бо иқдоми олимони Пажӯҳишгоҳи биологии Помири назди Академияи илмҳои Ҷумҳурии Тоҷикистон бо истифода аз оби гарми чашмаҳо гармхонаҳо сохта шуданд, ки аз онҳо соле ду маротиба ҳосили бодирингу помидор, гашничу пиёз ва дигар намуди сабзавоту сабзаҷот ба даст меоранд.

Ба гуфтаи  директори Пажӯҳишгоҳи мазкур Довутшо Наврӯзшоев, олимони ин муассиса исбот намуданд, ки бо истифода аз оби гарми зеризаминӣ парвариш намудани намудҳои мухталифи дарахтони мевадиҳанда имконпазир аст. Сифати меваи ин дарахтон ба корҳои иловагии селексионӣ ниёз надорад. Тадқиқот дар ин самт идома дорад. Бештари намуди дарахтон аввал дар Боғи ботаникии Помир мавриди таҳқиқ ва омӯзиш қарор мегиранд ва пас аз он ба хоҷагиҳо дастрас карда мешаванд.

Боғи набототи Помир яке аз боғҳои калонтарини Осиёи Марказӣ ва баландтарин боғи ботаникии ҷаҳон (баъди Боғи ботаникии Непал) ба шумор рафта, ҳудуди мамнӯъгоҳи он 600 гектарро ташкил медиҳад. Дар ин боғ 4 ҳазор намуд ва зернамуди растаниҳо аз кишварҳои Аврупо, Осиё ва Амрикову Россия парвариш меёбанд.