Дар Суғд иҷрои нақшаи кишти ғалладонагиҳо ба 99,1% расонида шуд

ХУҶАНД. 26.04.2017. /АМИТ «Ховар»/. Имрўзҳо дар ҷумҳурӣ кишти баҳорӣ бо маром идома дорад. Тавре ки ба АМИТ «Ховар» аз Сарраёсати кишоварзии вилояти Суғд иттилоъ доданд, ғаллакорони вилоят соли равон нақша доранд дар майдони 54751 гектар кишти ғалладонагиҳоро гузаронанд. То 24 апрел  корҳо 99,1% иҷро гардида, дар ин самт фаъолияти кишоварзони навоҳии Деваштич (112,9%), Ҷаббор Расулов (111,9%), Мастчоҳ (102,4%), Истаравшан (101,4%) ва Шаҳристон (99,6%) назаррас аст.

Ҳамчунин коштани сабзавот  низ идома дошта, то ин давра дар миқёси вилоят дар майдони 5103 га сабзавот кишт шудааст, ки он ба 64,2 %  баробар аст. Кишти картошка аз ҷониби кишоварзони вилоят дар майдони 3176 га анҷом дода шудааст, ки он 35,5% -и нақшаро ташкил медиҳад. Дар ин самт ноҳияҳои Спитамен, Б.Ғафуров, Ашт, Ҷ.Расулов, Мастчоҳ пешсаф буда, кишоварзони ноҳияҳои боқимонда низ кӯшиш доранд кишти картошкаро, ки соли равон тибқи нақша дар майдони 8935 гектар бояд гузаронида шавад, бо истифода аз ҳавои минтақаҳо дар муҳлати муайяншуда ба иҷро расонанд.