Дар вилояти Суғд ба сокинон моҳияти авфи муҳоҷирон фаҳмонида шуд

ДУШАНБЕ, 21.04.2017. /АМИТ «Ховар»/. Дар маҳаллаҳои Қорираҳмат Қурбонов, Тути калон, Масҷиди Савр, Шарқ ва Раззоқи шаҳри Хуҷанд суҳбату вохӯриҳои муштараки иттилоотӣ гузаронида шуд.
Тавре ки аз Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон хабар доданд, мақсади асосии вохӯриҳо ба шаҳрвандон фаҳмонидани моҳияти авфи муҳоҷират мебошад. Илова бар ин, дар вохӯрӣ масъалаҳои вобаста ба муҳоҷирати бехатар, пешгирии омилҳои номатлуб ва риояи меъёрҳои қонунгузорӣ мавриди баррасӣ қарор дода шуд.
Инчунин дар оғози ҳафта бо мақсади фаҳмонидани моҳияти авфи муҳоҷират мулоқоти масъулони Хадамоти муҳоҷират дар ҷамоати шаҳраки Палос бо муҳоҷирони меҳнатӣ, фаъолони маҳалҳо ва намояндагони табақаҳои гуногуни аҳолӣ доир гардид. Бояд гуфт, ки моҳияти авфи муҳоҷират тавассути рӯзномаи «Паёми Бӯстон» низ нашр гардид.
Ҳамчунин шуъбаи Хадамоти муҳоҷират дар шаҳри Исфара бо зиёда аз 80 нафар муҳоҷирони меҳнатӣ-сокинони ҷамоати деҳоти Кӯлканд низ вохӯрӣ гузаронид. Дар он масъалаҳои вобаста ба муҳоҷирати бехатар, моҳияти авфи муҳоҷират ва пешгирии шомилшавии ҷавонон ба ҳизбу ҳаракатҳои ифротгаро ва дигар омилҳои номатлуб баррасӣ шуданд