ҶДММ «Атласи Хуҷанд» дар семоҳаи аввал чанд метр матои атлас истеҳсол кард?

ДУШАНБЕ, 18.04.2017./АМИТ «Ховар»/. ҶДММ «Атласи Хуҷанд» бо дастгирӣ ва таваҷҷуҳи бевоситаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон фаъолияти худро баъд аз бозистии тӯлонӣ дубора барқарор намуда, истеҳсоли атласу адрасро роҳандозӣ намуд.
Дар айни замон дар корхонаи мазкур 32 адад дастгоҳҳои матоъбофӣ насб гардида, истеҳсоли атласу адрас, ки имрӯз талабот ба ин ду навъи матои миллии мардуми тоҷик ҳам дар дохил ва ҳам дар бозори минтақа бештар мебошад, васеъ ба роҳ монда шудааст.
Имрӯзҳо дар корхонаи мазкур беш аз 40 нафар бонувон ва ҷавонон машғули кор буда, зиёда аз 60 намуди матои атлас ва 30 намуди матои адрас истеҳсол мешаванд, ки аз нигоҳи сифат ва тарҳ ҷавобгӯ ба талабот мебошанд.
Ба иттилои Вазорати саноат ва технологияҳои нави Ҷумҳурии Тоҷикистон, давоми моҳҳои январ марти соли 2017 аз ҷониби ҶДММ «Атласи Хуҷанд» 0,92 ҳазор метри мураббаъ матои атлас истеҳсол карда шудааст.