Намоишгоҳ-ярмаркаи шашуми байналмилалии «Таҳсилоти Россия: Душанбе-2017» дар шаҳру навоҳии ҷумҳурӣ идома дорад

ДУШАНБЕ, 17.04.2017 /АМИТ «Ховар»/. Нуриддин Саид, Вазири маориф ва илми Ҷумҳурии Тоҷикистон аз Намоишгоҳ-ярмаркаи шашуми байналмилалии «Таҳсилоти Россия: Душанбе-2017», ки дар Донишгоҳи аграрии Тоҷикистон ба номи Шириншоҳ Шоҳтемур доир гардид, дидан намуд. Дар ин бора аз Вазорати маориф ва илм хабар доданд.
Зимни боздид аз Намоишгоҳ-ярмарка вазир бо намояндагони донишгоҳу донишкадаҳои Федератсияи Россия суҳбат намуда, ҷиҳати вусъат бахшидани ҳамкорӣ даъват кард, ки аз фурсати муносиб истифода намуда, муассисаҳои таҳсилоти олии касбии кишвар метавонанд як қатор созишномаҳоро вобаста ба табодули донишҷӯёну омӯзгорон, баргузории конфронсҳои муштарак ва анҷом додани корҳои илмии муштарак ба имзо расонанд.
Ҳамчунин зимни мулоқот намояндагони донишгоҳҳои Федератсияи Россия, аз қабили Донишгоҳи федералии Сибир, Донишгоҳи олии иқтисодии Москва, Донишгоҳи давлатии иқтисодии Самара аз донишу малака ва одобу рафтори донишҷӯёни тоҷик, ки дар муассисаҳои номбаршуда таҳсил менамоянд, изҳори қаноатмандӣ намуданд.
Ёдовар мешавем, ки Намоишгоҳ-ярмаркаи шашуми байналмилалии «Таҳсилоти Россия: Душанбе-2017», ки бо иштироки беш аз 40 муассисаи таҳсилоти олӣ дар Донишгоҳи аграрии Тоҷикистон ба номи Ш.Шоҳтемур оғоз ёфта буд, ҳоло дар дигар шаҳру ноҳияҳо идома дорад.