Ғолибияти наврасони тоҷик дар Олимапиадаи муҳорибавӣ дар Санкт-Петербург

ДУШАНБЕ, 20.04.2017. /АМИТ «Ховар»/. Дар Олимапиадаи намудҳои муҳорибавӣ, ки дар шаҳри Санкт-Петербурги Федератсияи Россия баргузор гардид, ду варзишгари наврасу ҷавони аъзои Шӯрои ҷумҳуриявии «Динамо»-и Вазорати корҳои дохилии Ҷумҳурии Тоҷикистон ширкат варзида, ҷойҳои намоёнро ба даст оварданд.
Тавре аз Вазорати корҳои дохилӣ иттилоъ доданд, дар мусобиқаи сатҳи байналмилалӣ, ки намояндагони 20 давлати ҷаҳон ва 10 вилояти Федератсияи Россия иштирок доштанд, намояндагони Тоҷикистон дар сабқатҳо аз намуди самбои оддӣ, касбӣ ва самбои муҳорибавӣ дар байни наврасон ва калонсолон баромад намуда, дар вазни худ ҷойҳои якумро ишғол намуданд ва бо Ҷом, медал ва Диплом ба Ватан баргаштанд.
«Ҳамин тариқ, динамочӣ Комрон Назаров дар вазни 68 кило дар ҳар се намуди сабқатҳо байни наврасони солҳои таваллуди 1998-1999 ва калонсолони соли таваллуди 1997, инчунин Беҳрӯз Ҳалимов дар вазни 57 кило миёни наврасон ҷойҳои 1-умро ба даст оварда, соҳиби шаҳодатномаи Устоди варзиши Федератсияи Россия гардиданд»,-хабар доданд аз Вазорат.