Сафорати Полша дар Хуҷанд Фестивали филмҳои кишварҳои чоргонаи «Вишеград»-ро баргузор менамояд

ХУҶАНД, 06.04.2017 /АМИТ «Ховар»/. Сафорати Полша ният дорад, ки дар шаҳри Хуҷанд Фестивали филмҳои кишварҳои чоргонаи «Вишеград»-ро баргузор намояд. Ин нуқта зимни мулоқоти Сафири Ҷумҳурии Полша дар Ҷумҳурии Тоҷикистон Пётр Ивашкевич бо раиси вилояти Суғд Абдураҳмон Қодирӣ таъкид гардид.
Тавре аз Хадамоти матбуоти Мақомоти иҷроияи ҳокимияти давлатии вилояти Суғд иттилоъ доданд, зимни суҳбат зикр шуд, ки ҳадафи асосии сафари Пётр Ивашкевич ба вилоят вусъат бахшидан ба муносибатҳои илмию фарҳангии кишварҳои чоргонаи «Вишеград» ва Ҷумҳурии Тоҷикистон ба ҳисоб меравад.
Доир ба баргузории Фестивали филмҳои кишварҳои чоргонаи «Вишеград» гуфта шуд, ки филмҳои пешниҳодшаванда маҳсули эҷоди филмбардорони ин чор давлати чоргонаи «Вишеград» ба ҳисоб рафта, сокинони вилоят ва дӯстдорони санъати кино имконият пайдо мекунанд, ки тӯли чанд рӯз тариқи филмҳо бо санъату фарҳанги кишварҳои Аврупо шиносоӣ пайдо намоянд.
Бояд зикр намуд, ки «Вишеград» соли 1991 дар шаҳри Вишеград созмон ёфта, ба он давлатҳои Чехия, Венгрия, Словакия ва Полша аъзо мебошанд.
Раиси вилояти Суғд Абдураҳмон Қодирӣ иқдоми сафорати Полшаро ҷиҳати ташкили фестивали филмҳо хуш пазируфта, изҳор намуд, ки ин чорабинии фарҳангӣ барои густариши муносибатҳои фарҳангии Ҷумҳурии Тоҷикистон ва давлатҳои Аврупо заминаи мусоид хоҳад гузошт.
Ҷонибҳо дар ҷараёни мулоқот доир ба ҳамкории тарафайн дар самти савдою тиҷорат ва сайёҳӣ низ мубодилаи афкор намуда, омодагии хешро барои густариши минбаъдаи ҳамкорӣ дар самти иқтисоду тиҷорат ва фарҳанг баён намуданд.