Дар Исфара ҳамкорӣ бо милитсия тақвият меёбад

ДУШАНБЕ, 18.05.2017. /АМИТ «Ховар»/. Дирӯз дар Қасри фарҳанги «Кимиёгарон»-и шаҳри Исфара бо ибтикори роҳбарияти мақомоти корҳои дохилии вилояти Суғд мулоқоти озоду ошкоро доир гардид. Зимни он сардори Раёсати Вазорати корҳои дохилӣ дар вилояти Суғд генерал-майори милитсия Шариф Назарзода бо фаъолон ва аҳли ҷамоати шаҳри Исфара суҳбат  доир намуд.

Тавре аз Вазорати корҳои дохилии Ҷумҳурии Тоҷикистон хабар доданд, вохӯрӣ бо мақсади коҳиш додани сатҳи ҷинояткорӣ дар вилояти Суғд, ҳамкории милитсия бо мардум, қабули муроҷиат ва арзу дархостҳои шаҳрвандон аз ҷониби роҳбарони мақомот дар маҳали зисташон, баргузор намудани корҳои маърифативу фаҳмондадиҳӣ ва  пешгирикунанда доир гардид.

Дар вохӯрӣ намояндагони масъули мақомоти иҷроияи ҳокимияти давлатии шаҳри Исфара, раисони ҷамоат ва шаҳраку деҳот, кумитаҳои маҳаллаҳо, имомхатибон, директорони мактабҳо, намояндагони соҳаҳои маориф, тандурустӣ, саноат ва нақлиёт, ҳамчунин ҷавонон ва фаъолони шаҳри Исфара иштирок намуданд.

Ба иштирокчиёни мулоқот филми мустанади дорои ҳадафи тарбиявии «Ворисони Аҳриман», ки аз ҷониби Маркази матбуоти РВКД дар вилояти Суғд омода шуда, аз ҳаёти талхи ҷавонони гумроҳшуда ва тақдири минбаъдаи онҳо, аҳдофи ғайридинӣ ва ғайриинсонии ҳизбу ҳаракат ва равияҳои ифротӣ, тақлидкорӣ ба фарҳанг ва тамаддуни ғайр қисса мекунад, ба намоиш гузошта шуд.

Сардори РВКД дар вилояти Суғд Шариф Назарзода оид ба вазъи содиршавии ҷиноятҳо, аз ҷумла ҷиноятҳои вазнин ва махсусан вазнин, риоя нагардидани талаботи қонунҳои Ҷумҳурии Тоҷикистон «Дар бораи озодии виҷдон ва иттиҳодияҳои динӣ», «Дар бораи масъулияти падару модар дар таълиму тарбияи фарзанд», «Дар бораи танзими анъана ва ҷашну маросимҳо дар Ҷумҳурии Тоҷикистон» ва «Дар бораи пешгирии зӯроварӣ дар оила», коста гардидани маърифати ҳуқуқӣ, оила ва шаҳрдорӣ, интизоми пасти иштирокчиёни ҳаракат дар роҳ, ҳуқуқвайронкунӣ аз ҷониби ноболиғон, тамоюли бегонапарастӣ, вазъи ҷинояткорӣ ва шомилшавии ҷавонон ба ҳизбу ҳаракат ва равияҳои тундрави ифротгаро, иштироки онҳо дар муқовиматҳои мусаллаҳонаи хориҷи кишвар бо овардани далел ва мисолҳои дақиқ аз ҷараёни тафтиши парвандаҳои ҷиноятӣ бо намоиши слайдҳои тасвирӣ ва видеоӣ сухан гуфт.