«Корвони ҷавонон» маърифати ҷавононро баланд мебарорад

ДУШАНБЕ, 09.05.2017 /АМИТ «Ховар»/. Бо дастгирии мақомоти иҷроияи ҳокимияти давлатии ноҳияи Бохтар ва Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон бахшида ба Соли ҷавонон дар ноҳия ҳамоиши иттилоотӣ-фарҳангии «Корвони ҷавонон» баргузор гардид.
Тавре аз бахши ҷавонон, вариш ва сайёҳии ноҳияи Бохтар хабар доданд, имрӯзҳо дар маҳаллаву деҳаҳои ҷамоатҳо мулоқоту вохӯриҳо бо ҷавонон ва падару модарон, барномаҳои фарҳангӣ, аксияҳои иттилоотӣ, намоиши дастовардҳои ҷавонон, ташкили «Корвони саломатӣ» ва мусобиқаҳои гуногуни варзишӣ баргузор мегардад.
Мақсад аз ташкили «Корвони ҷавонон» дар арафаи таҷлили ҷашни 20-солагии Рӯзи Ваҳдати миллӣ ва Соли ҷавонон- ин баланд бардоштани ҳисси ватандӯстӣ ҷавонони ҷамоатҳои шаҳраку деҳоти ноҳия ва намоиш додани дастовардҳои даврони соҳибистиқлолии мамлакат мебошад.
Ҳайати гурӯҳи кории «Корвони ҷавонон» аз ҳисоби кормандони ташкилоту муассисаҳо ва ҷавонони фаъоли ноҳия, аз ҷумла бахшҳои ҷавонон, варзиш ва сайёҳӣ, сабти асноди ҳолати шаҳрвандӣ, оид ба корҳои дин, танзими анъана ва ҷашну маросимҳои миллӣ, шуъбаҳои маориф, фарҳанг, тандурустӣ, кор бо занон ва оила таъсис дода шудааст.