Омӯзиши тарзи истифодаи дурусти журналистикаи чандрасонаӣ ба журналистони ҷавон

ДУШАНБЕ,18.05.2017/АМИТ «Ховар»/. Муассисаи давлатии «Академияи воситаҳои ахбори оммаи Тоҷикистон»  ба курси омӯзишӣ дар мавзӯи «Чандрасонаӣ дар ВАО-и муосир» оғоз кард.   Ба ин ҳамоиши омӯзишӣ кормандони эҷодии шабакаҳои телевизионӣ, нашрияҳо, оҷонсиҳои иттилоотии кишвар ҷалб гардиданд. Тӯли 5 рӯз тренерони соҳибтаҷриба Хилватшоҳи Маҳмуд ва Маҳпора Киромова ба рӯзноманигорони ҷавон  тарзи истифодаи дурусти журналистикаи чандрасонаиро ба таври назариявӣ ва амалӣ меомӯзонанд.

Семинари мазкур аз 15 то 19 май гузаронида мешавад.

Аз Муассисаи давлатии «Академияи ВАО-и Тоҷикистон»   ба АМИТ «Ховар» иттилоъ доданд, ки баъд аз анҷоми курси омӯзишӣ ба иштирокчиён шаҳодатнома  супорида мешавад.

Бояд тазаккур дод, ки Муассисаи давлатии «Академияи ВАО-и Тоҷикистон»   1 марти соли 2016 ба фаъолият оғоз карда, ҳадафи он такмили ихтисос ва бозомӯзии касбии кормандони  ВАО-и кишвар аст.