Ба театри Кӯлоб «Баҳори Ваҳдат» омад

ДУШАНБЕ, 21.06.2017 /АМИТ «Ховар»/.    «Баҳори Ваҳдат»-таҳти чунин унвон аз ҷониби  ҳунармадони Театри вилоятии мазҳакаи мусиқии ба номи Саидалӣ Вализодаи шаҳри Кӯлоб бахшида ба ҷашни таърихии миллат- 20- солагии Ваҳдати миллӣ спектакл рӯи саҳна оварда шуд, ки он бори дигар сокинонро ба ватандӯстӣ ва муттаҳидию якдигарфаҳмӣ   даъват менамояд.

Тавре Мақомоти иҷроияи ҳокимияти давлатии вилояти Хатлон хабар медиҳад, «Баҳори Ваҳдат» аз рӯи асари Ҷумъа Қуддус дар таҳияи коргардони театри вилоятӣ Раҳмоналӣ Одинаев  рӯи саҳна оварда шудааст.

Бояд гуфт, ки  муҳтавои спектакл фарогири воқеоти  солҳои 90-ум буда, дар бораи чӣ гуна ба имзо расидани Созишномаи умумии истиқрори сулҳ ва ризоияти миллӣ, иттиҳоду ягонагии мардум, пирӯзии  ақлу заковат, аҳамияти сарҷамъии миллат ва  иттиҳоду ягонагии  мардум   нақл мекунад.