Ҳаҷми маҳсулоти саноатӣ дар Тоҷикистон афзудааст

ДУШАНБЕ, 27.07.2017 /АМИТ «Ховар»/. Ҳаҷми истеҳсоли маҳсулоти саноатӣ дар нимсолаи аввал аз ҳисоби корхонаҳои азими кишвар, назири «Ширкати кӯҳӣ-саноатии Тоҷикистону Чин», «Зарафшон», «Хуаксин Ғаюр Суғд семент», «Анзоб», «Норд азия металл», «Ҷунтай моҳир семент», «Ҷавонӣ», «Ҷунтай Данғара Текстил» ва дигар корхонаҳои саноатии кишвар дар маҷмӯъ нисбат ба ҳамин давраи соли гузашта наздик ба 1,7 миллиард сомонӣ зиёд шуд.

Вазири саноат ва технологияҳои нави Ҷумҳурии Тоҷикистон Шавкат Бобозода 26 июл зимни нишасти матбуотӣ дар ҷамъи хабарнигорон гуфт, ки   дар шаш моҳи соли равон рушди саноат ғайр аз навоҳии тобеи марказ дар дигар минтақаҳои кишвар таъмин гардида, афзоиши ҳаҷми истеҳсоли  маҳсулоти саноатӣ дар вилояти Суғд беш аз 137 фоиз,  Хатлон зиёда аз 117 фоиз, Бадахшон беш аз 111  ва дар пойтахти кишвар- шаҳри Душанбе зиёда аз 103 фоизро ташкил дод.  Таъкид гардид, ки аз ҳаҷми маҳсулоти дар ин давра истеҳсолгардида беш аз 97 фоизи он ба фурӯш бароварда шудааст.