Дар Донишкадаи забонҳои Тоҷикистон беш аз 50 синфхонаи замонавии мултимедӣ бунёд мегардад

ДУШАНБЕ, 19.07.2017. /АМИТ «Ховар»/. Дар Донишкадаи  давлатии  забонҳои  Тоҷикистон ба номи Сотим Улуғзода  нақшаҳои таълимии нав аз рӯи 27 ихтисос барои зинаи бакалавр ва 5 ихтисос барои зинаи магистратура  таҳия гардида, то оғози соли таҳсили нави 2017-2018 беш аз 50 синфхонаи замонавии мултимедӣ  ба истифода дода мешаванд. Дар ин бора имрӯз зимни нишасти матбуотӣ ректори Донишкадаи  давлатии  забонҳои  Тоҷикистон ба номи Сотим Улуғзода  Маҳмадулло Раҷабзода иттилоъ дод.

Зикр гардид, ки сатҳи дониши донишҷӯёни Донишкада дар давраи ҳисоботӣ 88 дарсадро ташкил медиҳад, ки нисбат ба соли гузашта 5 фоиз баланд аст. Аз 1830 нафар донишҷӯи чор факултет 1824 нафар  ба сессияи  имтиҳонӣ роҳ ёфтанд. Даври академии дуюмро  59 нафар донишҷӯ бо баҳои аъло, 503 нафар донишҷӯ бо баҳои хубу аъло, 30 нафар бо баҳои хуб, 1003 нафар бо баҳои омехта ва 15 нафар бо баҳои миёна ҷамъбаст намуданд.