Дар гарнизони «Хоруғ» машқҳои стратегии зиддитеррористӣ бо ҷалби беш аз 10 ҳазор баргузор карда мешаванд

ДУШАНБЕ, 18.07.2017 /АМИТ «Ховар»/. Аз 17 то 20 июли соли 2017 дар ҳудуди ВМКБ бо ҷалби сохтору мақомоти қудратии гарнизони «Хоруғ» ҷамъомади мудофиаи ҳудудӣ, машғулиятҳои омодагии сафарбарӣ ва маҷмӯи машқҳои муштараки амалиётӣ-стратегии зиддитеррористӣ бо тирпарронии ҷангӣ ҷараён мегиранд.

Дар ин бора ба АМИТ «Ховар» аз Вазорати мудофиаи Тоҷикистон иттилоъ доданд.

«Машқҳои мазкур бо супориши Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тибқи нақшаи муштараки маҷмӯи чорабиниҳои асосии Қувваҳои Мусаллаҳи Ҷумҳурии Тоҷикистон барои соли 2017 баргузор ва дар ҷараёни баргузории машқҳо зиёда аз 10 ҳазор нафар ҳайати шахсӣ ҷалб карда мешаванд», — гуфт намояндаи расмии Вазорати мудофиа.

Ҷиҳати иҷрои машғулиятҳои омодагии сафарбарӣ ва ҷамъомади мудофиаи ҳудудӣ дар гарнизони «Хоруғ» ва ҳар як ноҳияи ВМКБ ситоди муштараки идоракунии қӯшунҳо ташкил гардида, захираи эҳтиётии даъватшавандагон, шаҳрвандони дар қайди комиссариятҳои ҳарбибуда, техникаҳои хоҷагии қишлоқ ва дигар лавозимоти барои баргузории ин машқҳои муҳими низомӣ зарурӣ истифода бурда мешаванд.

Дар ҷараёни баргузории ҷамъомади мудофиаи ҳудудӣ раисони шаҳру ноҳияҳои ВМКБ, сардорони шуъбаҳои сохторҳои қудратии ин минтақа ба машғулиятҳои омодагии сафарбарӣ, сафороию қадамзанӣ, тартиби дурусти ҳуҷҷатгузорӣ, тирпарронӣ аз силоҳу муҳимоти сабуки ҷангӣ ҷалб карда мешаванд.

«Зимни  ҷамъбаст дар ҳудуди ноҳияи Дарвоз ва машқгоҳи ҳарбии «Тем»-и Хоруғ бо истифода аз 100 адад техникаҳои зиреҳпӯши ҷангӣ, артиллерия ва автомошинаҳо, чархболу ҳавопаймоҳои ҳарбиву нақлиётӣ ва дигар силоҳу муҳимоти ҷангӣ, машқҳои муштараки баталйонӣ-техникӣ доир карда мешаванд», — зикр кард манбаъ.