Хадамоти гумрук: дар Тоҷикистон воридот коҳиш, содирот афзоиш ёфтааст

ДУШАНБЕ, 18.07.2017 /АМИТ «Ховар»/.  Мақомоти гумруки Тоҷикистон аз коҳиш  ёфтани воридот ва афзоиши содирот хабар медиҳад. Гуфта мешавад, ки ба Ҷумҳурии Тоҷикистон дар нимсолаи аввали соли равон ба маблағи беш аз 1 миллиарду 246 миллион доллар молу маҳсулот ворид гардидааст. Маблағи умумии молҳои аз Тоҷикистон ба хориҷи кишвар содирот гардида 436, 3 миллион долларро  ташкил медиҳад.

Тибқи оморҳои гумрукӣ,  воридот дар ин давра  ба маблағи 253,9 миллион доллар  ё ба андозаи 16,9 фоиз коҳиш ёфтааст. Содирот бошад  ба маблағи 17,7 миллион доллар  ё 4,2 фоиз афзоиш ёфтааст.

Сардори Хадамоти  гумруки назди Ҳукумати Ҷумҳурии Тоҷикистон Абдуфаттоҳи Ғоиб 18 июл дар ҷамъи хабарнигорон дар Душанбе гуфт, ки дар ин давра коҳиш ёфтани ҳаҷми воридот ба як қатор омилҳо, аз ҷумла бӯҳрони молиявӣ дар бозори ҷаҳонӣ, вазъи сиёсии баъзе аз кишварҳои ҷаҳон, инчунин ба роҳ мондани истеҳсол ва афзоиши молу маҳсулоти ватанӣ, назири  семент, қолин, гандум, ва маҳсулоти пластикӣ рабт дорад.

Абуфаттоҳи Ғоиб бо натиҷагирӣ аз фаъолияти  мақомоти гумруки кишвар дар зарфи шаш моҳи соли равон зикр кард, ки гардиши  тиҷорати  хориҷии Ҷумҳурии Тоҷикистон  дар нимсолаи аввали соли равон  беш аз  1 миллиарду  682 миллион долларро  ташкил дод, ки   нисбат ба ҳамин давраи соли гузашта  236 ,2 миллион доллар  ё 12, 3 фоиз кам мебошад.