Роғун: нисбат ба 48 нафар падару модарон бо моддаи 90-и Кодекси ҳуқуқвайронкунии маъмурӣ парванда оғоз гардид

РОҒУН, 26.07.2017 /АМИТ «Ховар»/.   Дар нимсолаи аввали соли 2017 дар шаҳри Роғун  38  ҷиноят ба қайд гирифта шудааст, ки 9 ҳолати онро ноболиғон иҷро намудаанд. Ҳарчанд сатҳи ҷинояткорӣ нисбат ба ҳамин давраи соли гузашта дар шаҳри Роғун 36,67 фоиз кам шудааст, вале ҷинояткорӣ аз ҷониби ноболиғон зиёд гардидааст.

Раиси шаҳри Роғун Билол Иброҳим зимни нишасти матбуотӣ иброз дошт, ки  аз сабаби бемасъулиятии падару модарон нисбат ба фарзандони ноболиғ ин намуди ҷинояткорӣ зиёд гардидааст. Мутаассифона, то имрӯз  аз тарафи шуъбаи ВКД дар шаҳр нисбат ба 48 нафар падару модарон бо моддаи 90-и Кодекси ҳуқуқвайронкунии маъмурӣ парванда оғоз гардида, ба суд  ирсол гардидааст.