Руҳулло Ҳакимзода: «Амонатбонк» барои ба кор ҷалб намудани маъюбон тамоми кӯшишҳоро ба харҷ медиҳад»

ДУШАНБЕ, 18.07.2017. /АМИТ «Ховар»/. Дар айни замон дар Бонки давлатии амонатгузории «Амонатбонк» 14 нафар маъюбон бо кори доимӣ таъмин гардидаанд.

Раиси Раёсати БДА «Амонатбонк» Руҳулло Ҳакимзода имрӯз зимни нишасти матбуотӣ зикр кард, ки «Амонатбонк» минбаъд низ ҷиҳати дастгирӣ намудан ва бо кори доимӣ таъмин намудани маъюбон тамоми кӯшишро ба харҷ медиҳад, то онҳо ба фаъолияти корӣ ҷалб карда шаванд.

Ба гуфтаи Руҳулло Ҳакимзода: «Ҷиҳати дастгирӣ ва бо кор таъмин намудани маъюбон «Амонатбонк» бо Омӯзишгоҳи касбии техникии маъюбон, воқеъ дар шаҳри Душанбе ҳамкориро ба роҳ монда, ҳамасола 25 нафар донишҷӯёнро барои коромӯзӣ ба  бонк ҷалб мекунад».

Зикр карда шуд, «Амонатбонк» дар самти дастгирӣ ва ҷалби кадрҳои масъулиятноку баландихтисос, бахусус занону ҷавондухтарон таваҷҷуҳи хоса дорад. Ин раванд таҳти назорати доимии роҳбарияти Бонк қарор дошта, дар ин самт корҳо бомаром идома доранд.