ТАҚВИМИ АМИТ «ХОВАР»: Имрӯз 18 июл, сешанбе, 199-умин рӯзи соли 2017 аст. То охири сол 166 рӯзи дигар боқӣ мондааст

Тақвими моро ҳар рӯз дар ин гӯша    

шореҳ Шукӯҳи ДАЛЕР варақ мезанад:

18 июли соли 2009 Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Президенти Федератсияи Россия Дмитрий Медведев оид ба масоили гуногунҷанбаи ҳамкориҳои Тоҷикистон ва Россия мулоқоти судманд анҷом дода буданд.

***

18 июли соли 2012 Пешвои миллат муҳтарам Эмомалӣ Раҳмон барои шиносоӣ бо корҳои кишоварзӣ ва мулоқоту суҳбат бо мардум ба ноҳияи Рӯдакӣ ташриф оварданд. Сарвари давлат Эмомалӣ Раҳмон бо фаъолияти як зумра хоҷагиҳои деҳқонӣ, шабакаҳои обрасонӣ, як маркази илмию таҷрибавии Академияи кишоварзӣ ва як корхонаи парвариши гулмоҳӣ шинос шуда, бо мардуми касбу кори гуногун мулоқоту суҳбатҳо анҷом доданд. Таваҷҷуҳи асосӣ ба истифодаи пурсамари заминҳои корам, хусусан заминҳои обӣ, рӯёндани ду ва зиёда ҳосил, баланд бардоштани ҳосилнокии зироатҳо ва таъмини фаровонию арзонӣ дар бозори истеъмолӣ ва амнияти озуқавории кишвар зоҳир гардид.

***

4 сол пеш, 18 июли соли 2013 Президенти Ҷумҳурии Тоҷикистон муҳтарам Эмомалӣ Раҳмон бо масъулини Ҳукумат ва Дастгоҳи иҷроияи Сарвари давлат, роҳбарони як қатор вазорату идораҳо ва раисони ноҳияҳои пойтахт ва шаҳру ноҳияҳои атрофи он машварати корӣ доир намуда буданд. Дар машварат масоили вобаста ба вазъи молиявию иқтисодии муассисаҳо ва ширкатҳои соҳаи авиатсияи гражданӣ, корҳои ободонию созандагӣ ва рафти кишти такрорӣ баррасӣ шуда буд.

18 ИЮЛ ТАҶЛИЛ КАРДА МЕШАВАД:

Рӯзи байналмилалии Нелсон Мандела. Ин рӯз аз соли 2009 инҷониб ҷашн гирифта мешавад ва бо мақсади арҷ гузоштан ба корҳои анҷомдодаи собиқ Президенти Африқо Нелсон Мандела дар роҳи сулҳ ва озодӣ роҳандозӣ гардидааст.

***

Дар Испания- Рӯзи меҳнат.

***

Дар Россия- Рӯзи хизматчиёни хадамоти ҳифзи ҳуқуқи корҳои дохилӣ.

***

Дар Уругвай – Рӯзи Конститутсия.

РӮЙДОДҲО:

18 июли соли 1997 Конференсияи навбатии Ҳаракати Ваҳдати миллӣ ва эҳёи Тоҷикистон баргузор гардидааст.

***

18 июли соли 1916 иттифоқҳои касабаи Англия ба мувофиқа расиданд, ки ҳангоми амалиётҳои ҷангӣ таҷлил намудани ҷашнҳо манъ карда шавад.

***

18 июли соли 1948 дар Коста-Рика фаъолияти Ҳизби коммунистӣ  қатъ карда шудааст.

***

  18 июли соли 1950 Англия содироти нафтро ба Хитой манъ карда буд.

***

55 сол муқаддам, 18 июли соли 1962 дар Перу табаддулоти ҳарбӣ ба вуқӯъ омадааст.

***

18 июли соли 1968  ширкати «Intel» таъсис дода шудааст.

 ИНЧУНИН ДАР ИН РӮЗ…

Соли 1872 дар Британияи Кабир аввалин маротиба дар интихобот овоздиҳии пинҳонӣ  ба қайд гирифта шудааст.

***

Соли 1931 дар Америка аввалин маротиба дар таърихи ҷаҳон киштие, ки дар он ҳавополо (кондиционер) насб гардида буд, ба ҳаракат даромадааст.

***

Соли 1985 аввалин «Тетрис» сохта шудааст.