Зиёда аз 30 нафар донишҷӯёни ДДТТ таҳсилро дар донишгоҳҳои бонуфузи Аврупо анҷом доданд

ДУШАНБЕ, 13.07.2017 /АМИТ «Ховар»/. Дар нимсолаи аввали соли равон ба донишгоҳҳои хориҷи кишвар 10 нафар донишҷӯён ва устодони  Донишгоҳи давлатии тиҷорати Тоҷикистон фиристода шудаанд. Аз ҷумла як нафар дар зинаи магистратураи Донишгоҳи савдою иқтисоди кооператсияи матлуботи Беларус, 1 нафар дар риштаи магистратураи Донишгоҳи кооператсияи матлуботи Сибир, 4 нафар омӯзгорону донишҷӯён дар риштаи бакалавриатура ва PhD-Донишгоҳи Пизаи Италия ва 2 нафар донишҷӯёни факултаи муносибатҳои иқтисодии байналмилалӣ дар риштаи бакалаври Донишгоҳи Кемянги Кореяи Ҷанубӣ идомаи таҳсил намуданд.

Дар ин бора имрӯз зимни нишасти матбуотии Донишгоҳи давлатии тиҷорати Тоҷикистон иттилоъ дода шуд.

Тавре ректори Донишгоҳ Ҳамидуллохон Фақиров изҳор намуд: «Зиёда аз 30 нафар донишҷӯёни ДДТТ дар донишгоҳҳои бонуфузи Аврупо таҳсилро анҷом доданд. Мо имрӯз аввалин номзадҳои доктор DhD-ро дорем, ки онҳо дорандаи дипломи доктории донишгоҳҳои аврупоӣ ҳастанд. Донишҷӯёни мо фаъолона дар доираи барномаи табодули Донишгоҳи менеҷменти Алмаато ва Донишгоҳи иқтисодии Қарағандаи Қазоқистон иштирок намуда, соли равон 13 нафар барои идомаи таҳсил ба Донишгоҳи менеҷменти Алмаато роҳхат гирифтанд».