«Барқи тоҷик»: ҳаҷми истеҳсоли энергияи барқ 7 млрд 736 млн.кВт.соатро ташкил дод

ДУШАНБЕ, 1.08.2017 /АМИТ «Ховар»/. Дар шашмоҳаи аввали соли равон ҳаҷми истеҳсоли энергияи барқ дар ҷумҳурӣ 7 млрд 736 млн.кВт.соатро ташкил дод, ки ин нисбат ба ҳамин давраи соли гузашта 645,3 млн.кВт.соат зиёд мебошад.
Дар ин бора имрӯз зимни нишасти матбуотӣ Раиси Ширкати «Барқи тоҷик» Мирзо Исмоилзода ба рӯзноманигорон иттилоъ дода, зикр намуд, ки бо мақсади таъмини соҳаҳои иқтисодиёт ва аҳолии ҷумҳурӣ бо энергияи  барқ дар нимсолаи якум ширкат дар ҳаҷми 1310,8 млн.кВт.соат энергияи барқро асосан аз НБО-и «Сангтӯда-1» ва «Сангтӯда-2» харидорӣ намуд.
Ба гуфтаи Мирзо Исмоилзода, дар шашмоҳаи якуми соли 2017 тарифи миёна барои 1 кВт.соат энергияи барқи истифодашуда 15,50 дирамро ташкил дод, ки нисбат ба ҳамин давраи соли гузашта 2,7 дирам зиёд мебошад.
Зимни нишасти матбуотӣ Мирзо Исмоилзода аз сари вақт напардохтани маблағи барқ изҳори нигаронӣ карда, яке аз мушкилиҳои асосии соҳаро,  ки масъулинро ба ташвиш овардааст, масъалаи ҷамъоварии маблағ ҳисобид. «Яке аз мушкилиҳои асосии соҳа- ин дар сатҳи ниҳоят паст пардохт шудани маблағ аз тарафи истифодабарандагони азими ҷумҳурӣ мебошад. Мутаассифона, маблағи энергияи барқи истифодашуда аз тарафи истифодабарандагон сари вақт ва пурра пардохт намегардад, ки ин ба вазъи молиявии ШСХК «Барқи Тоҷик» таъсири манфӣ расонида, барои дар сатҳи зарурӣ гузаронидани корҳои таъмирию барқарорсозӣ монеа эҷод мекунад»,-изҳор дошт ӯ.