«Бонки Эсхата» дар доираи аксияи «Рушди кишоварз» фоизҳои худро паст намуд

ДУШАНБЕ, 25.08.2017 /АМИТ «Ховар»/. ҶСК «Бонки Эсхата» дар доираи аксияи “Рушди кишоварз” ба сокинони ноҳияҳои Ҷайҳун ва Панҷ, ки бо хоҷагии қишлоқ машғуланд, фоизи қарзҳоро нисбатан паст намуд. Акнун фоизи қарз 27%-и солонаро ташкил медиҳад.

Тавре ба АМИТ “Ховар” аз ҶСК “Бонки Эсхата” хабар доданд, аксияи мазкур танҳо барои деҳқонони ноҳияҳои номбурда, ки бо кишти пиёзу сабзӣ дар мавсими тирамоҳ машғул хоҳанд шуд,  татбиқ гардидааст.

Маблағи қарз то 900 ҳазор сомониро ташкил медиҳад.

Хотиррасон мекунем, ки гирифтани қарз бо траншҳо яке аз афзалиятҳои ин намуди қарз маҳсуб меёбад. Он ба мизоҷ имконият медиҳад бори дигар пардохтпазирии худро санҷида барояд.

Аксияи “Рушди кишоварз” аз 21 август то 30 ноябри соли 2017  идома меёбад.