Дар арафаи ҷашни Истиқлолият беҳтарин корхона, муассиса ва ташкилоти давлатии ободкори Душанбе муайян мешаванд

ДУШАНБЕ, 1.08.2017. /АМИТ «Ховар»/. 31 июл дар Вазорати фарҳанги Ҷумҳурии Тоҷикистон таҳти роҳбарии Раиси Кумитаи рушди маҳали назди Президенти Ҷумҳурии Тоҷикистон Қосим Роҳбар ҷаласаи навбатии шиносоӣ бо тартибу талабот оид ба баргузории чорабиниҳои озмун мутобиқи Амри Президенти Ҷумҳурии Тоҷикистон аз 19 апрели  соли 2017 ва фармоиши Ҳукумати Ҷумҳурии Тоҷикистон аз 22 феврали соли 2017 вобаста ба муайян намудани беҳтарин мақомоти марказии ҳокимияти давлатӣ, мақомоти иҷроияи маҳаллии ҳокимияти давлатӣ, корхона, муассиса ва ташкилоти давлатии ҷумҳуриявӣ оид ба корҳои ободонӣ, бунёди гулгаштҳо, сабзазоркунӣ, сохтмони майдончаҳои варзишӣ ва барқарорсозии боғҳо дар ҳудуди шаҳри Душанбе бахшида ба ҷашни 26-солагии Истиқлолияти давлатии Ҷумҳурии Тоҷикистон баргузор гардид.
Тавре аз Кумитаи рушди маҳали назди Президенти Ҷумҳурии Тоҷикистон ба хабарнигори АМИТ «Ховар» иттилоъ доданд,  дар  ҷаласаи мазкур сардори Раёсати кор бо мақомоти идоракунии маҳали Дастгоҳи иҷроияи Президенти Ҷумҳурии Тоҷикистон Ёқуб Исмоилзода, муовини Раиси Кумитаи кор бо ҷавонон–роҳбари гурӯҳи корӣ оид ба майдончаҳои варзишӣ Дилноза Аҳмадзода,  роҳбари гурӯҳ оид ба ободонӣ аз Хоҷагии манзилии коммуналӣ Марҳабо Султонова ва кормандони Кумитаи рушди маҳал ширкат варзиданд.
Ҳадафи ҷаласа аз мушаххас намудани тартиб, шарти баргузории озмун ва муайян намудани ғолиб дар самтҳои пешбинигардида иборат буда, ҳамзамон вазифаҳои гурӯҳи корӣ, риояи шарт ва муҳлатҳои баргузории озмун муҳокима гардид.