Дар минтақаҳои Тоҷикистон сохтмони сардхонаҳо оғоз мегардад

ДУШАНБЕ, 3.08.2017 /АМИТ «Ховар»/. Муассисаи давлатии «Рушди соҳибкорӣ дар соҳаи кишоварзӣ» дар доираи лоиҳаи тиҷоратикунонии соҳаи кишоварзӣ нақша дорад, ки барои нигоҳдории маҳсулоти кишоварзии деҳқонон дар ояндаи наздик бунёди сардхонаҳоро ба роҳ монад. Дар ин бора имрӯз директори ин муассиса Ҳабибулло Саъдуллоев зимни нишасти матбуотӣ дар толори Маркази матбуоти ҷумҳуриявии «Ховар» хабар дод.
Тавре Ҳабибулло Саъдуллоев баён дошт, «яке аз вазифаҳои муассиса, қабл аз ҳама, гузаронидани таҳлил ва муайян кардани мушкилоти дар самти соҳаи кишоварзӣ ҷойдошта ба шумор меравад. Ҳангоми таҳлилу баррасӣ аз ҷониби муассиса ба мо маълум гашт, ки яке аз мушкилоте, ки деҳқонони мо бо он рӯ ба рӯ мешаванд, ин мавҷуд набудани сардхонаҳо барои нигоҳдории маҳсулот пас аз ҳосилғундорӣ мебошад. Дар лоиҳа сохтмони сардхонаҳо дар шакли хурд мавҷуд аст ва дар ояндаи наздик бунёди он дар назар дошта шудааст».
Иттилоъ дода шуд, ки минтақаҳои фарогири лоиҳа ноҳияҳои тобеи марказ, вилояти Хатлон ва Суғдро дарбар гирифта, лоиҳаи мазкур  барои баланд бардоштани тиҷоратикунонии кишоварзӣ тавассути мустаҳкам намудани қобилияти шакли нави хоҷагиҳои деҳқонии хурди хусусӣ бо мақсади ҷалби онҳо ба фаъолияти тиҷоратӣ бо бахши агробизнес ва дастрасӣ ба бозорҳо пешбинӣ шудааст.