Дар шаҳри Қӯрғонтеппа ду майдончаи варзишӣ бунёд гардид

ДУШАНБЕ, 11.08.2017 /АМИТ «Ховар»/. Дирӯз бахшида ба Рӯзи варзишгарон ва Соли ҷавонон дар маҳаллаи «Садриддин Айнӣ»-и шаҳри Қӯрғонтеппа аз тарафи мақомоти иҷроияи ҳокимияти давлатии шаҳр ва соҳибкори маҳаллӣ Маҳмадшариф Саъдуллоев ду майдончаи футболи хурд ба истифода дода шуд.

Тавре аз Мақомоти иҷроияи ҳокимияи давлатии шаҳр хабар доданд, дар маросими кушодашавии майдончаҳои варзишӣ раиси вилояти Хатлон Давлатшоҳ Гулмаҳмадзода, иҷрокунандаи вазифаи раиси шаҳри Қӯрғонтеппа Абдуалим Исмоилзода, раиси Федератсияи футболи вилояти Хатлон Исроил Шарипов, мудири бахши кор бо ҷавонон ва варзиши шаҳр Ҷамолиддин Исматуллозода, сокинон ва роҳбарони маҳалла иштирок намуданд.

Давлатшоҳ Гулмаҳмадзода зикр намуд, ки барои тарбияи дуруст, тарғиби ҳаёти солим ва тансиҳат ба воя расидани насли имрӯза аз ҷониби Ҳукумати ҷумҳурӣ тамоми шароиту имкониятҳо фароҳам оварда шудаанд. «Ин майдоначаҳои варзишӣ туҳфа ба сокинони шаҳранд, то онҳо пайваста ба варзиш ва фароғату истироҳат машғул шаванд»,-изҳор намуд ӯ.

Ба иттилои манбаъ, майдончаҳои варзишӣ бо маблағи беш аз 1 миллиону 64 ҳазор сомонӣ сохта шуда, дорои ошхона, хуҷраи либосивазкунӣ, мағозаи варзишӣ ва чаҳор утоқи корӣ мебошанд.