Дар Тоҷикистон шаш қабулгоҳи ҷамъиятии Ваколатдор оид ба ҳуқуқи инсон фаъолият мекунад

ДУШАНБЕ, 03.08.2017 /АМИТ «Ховар»/. Имрӯз зимни нишасти мабуотӣ Ваколатдор оид ба ҳуқуқи инсон дар Ҷумҳурии Тоҷикистон Зариф Ализода ба хабарнигорон иттилоъ дод, ки дар шашмоҳаи  аввали соли равон 2 ҳазору 262 адад  муроҷиати шаҳрвандон ба қайд гирифта шудааст.
Ба гуфтаи номбурда, аз ин миқдор муроҷиат 130 адади он муроҷиати хаттӣ буда, бештар ба масъалаҳои муҳокимаи одилонаи судӣ, манзил, ҳуқуқи инсон ва мақомоти ҳифзи ҳуқуқ, таъминоти иҷтимоӣ (алимент) вобаста мебошанд.
«Тибқи нақшаи корӣ мақомоти Ваколатдор оид ба ҳуқуқи инсон дар якҷоягӣ бо мақомоти давлатӣ ва сохторҳои ҷомеаи шаҳрвандӣ дар муассисаҳои иҷрои ҷазои ҷиноятӣ, тавқифгоҳҳои тафтишотӣ, тавқифгоҳҳои нигоҳдошти муваққатӣ, қисмҳои ҳарбӣ, хонаҳои маъюбон ва пиронсолон, мактаб-интернатҳо, мактаб-парастишгоҳҳо ва муассисаҳои таҳсилоти миёнаи умумӣ санҷишу мониторинг ва боздид гузарониданд, ки ин яке аз муҳимтарин фаъолияти мақомоти Ваколатдор оид ба ҳуқуқи инсон ба ҳисоб меравад»,- иброз намуд Зариф Ализода.
Ба иттилои манбаъ, ҳоло дар ҷумҳурӣ се Намояндагӣ ва шаш қабулгоҳи ҷамъиятии Ваколатдор оид ба ҳуқуқи инсон фаъолият менамоянд, ки дар онҳо 12 нафар мутахассисони ботаҷриба кор мекунанд.