Ҷилавгирӣ аз кӯшиши интиқоли 2,6 ҳазор кг оҳанпора ба Афғонистон аз сӯи гумрукчиён

ДУШАНБЕ, 04.08.2017/АМИТ «Ховар»/. Гумрукчиёни тоҷик дар дидбонгоҳи гумрукии «Панҷи поён», воқеъ дар ҷануби Тоҷикистон аз интиқоли ғайриқонунии 2,6 ҳазор кг оҳанпора ба Афғонистон ҷилавгирӣ карданд. Дар ин хусус ба АМИТ «Ховар» аз Маркази матбуоти Хадамоти гумруки назди Ҳукумати Ҷумҳурии Тоҷикистон иттилоъ доданд.

Гуфта мешавад, ки ин миқдор оҳанпора зимни гузаронидани муоинаи гумрукии ду воситаи нақлиёти боркаши тамғаи «МАN», рақамҳои қайди давлатиашон ТҶ 24 76 ЕЕ 01 ва ТҶ 83 06 СТ 01, ки аз ҷониби шаҳрвандони Тоҷикистон Ҳ.Н., ва Афғонистон Ҳ.С., идора мегардиданд, аз зери халтаҳои семент дарёфт гардидааст. Номбурдаҳо мехостанд бидуни назорати гумрукӣ 2,6 ҳазор кг оҳанпораҳоро  аз Тоҷикистон ба Афғонистон интиқол диҳанд.

Нисбат ба ин ҳолатҳо парвандаҳои ҳуқуқвайронунии маъмурӣ оғоз карда шуда, барои баррасӣ ба суди ноҳияи Ҷайҳун ирсол гардидаанд.