Исфара: гурӯҳи 30-нафараи волидайн ба аёдати сарбозон рафтанд

ДУШАНБЕ, 02.08.2017 /АМИТ «Ховар»/. Аз шаҳри Исфараи вилояти Суғд 30 нафар волидайни ҷавонписароне, ки ҳоло дар сафи  Қувваҳои Мусаллаҳи Ҷумҳурии Тоҷикистон адои хизмат мекунанд, ба аёдати фарзандонашон сафарбар карда шуданд. Дар ин бора аз Мақомоти иҷроияи ҳокимияти давлатии шаҳри Исфара ба АМИТ «Ховар» хабар доданд. Дар ин сафар волидайни сарбозонро намояндагони бахши кор бо ҷавонон ва варзиш, шуъбаи рушди иҷтимоиёт ва робита бо ҷомеа, шуъбаи кор бо занон ва оилаи Мақомоти иҷроияи ҳокимияти давлатии шаҳри Исфара ҳамроҳӣ намуданд.
Бино ба иттилои манбаъ, волидайни сарбозон тайи ду рўз аз 15 қисми низомии мустақар дар шаҳрҳои Душанбеву Ваҳдат ва ноҳияи Рўдакӣ боздид ба амал оварда, тавассути суҳбату мулоқот бо сардорони қисмҳои ҳарбӣ, сарбозон ва боздид аз макони хизмату истироҳати аскарбачаҳо аз аҳвол ва ҷараёни хизмати ҷавонписаронашон дар сафи Қувваҳои Мусаллаҳ огаҳӣ пайдо намуданд.
Волидайн фарзандонашонро бардаму солим, обутобёфта ва бо чеҳраҳои хуррам дида, ба Ҳукумати Ҷумҳурии Тоҷикистон барои ғамхории ҳамарўза дар ҳаққи сарбозон сипосгузорӣ  намуданд.