КИТОБ – САРЧАШМАИ ИТТИЛООТ. Китобдорони донишгоҳу муассисаҳо бозомӯзӣ мекунанд

ДУШАНБЕ, 01.08.2017 /АМИТ «Ховар»/. Китобхонаи миллии Тоҷикистон ҳамчун маркази асосии таҷрибаомӯзии китобдорон пайваста бо донишгоҳу донишкадаҳои олии кишвар, коллеҷу муаассисаҳои фарҳангӣ, ҳамзамон бо китобхонаҳои  шаҳру навоҳии ҷумҳурӣ ҳамкории зич ба роҳ монда, дар самти табодули таҷрибаи донишҷӯёну мутахассисони соҳа пайваста курсҳои бозомӯзӣ мегузаронад.
Чанде пеш панҷ нафар кормандони  китобхонаи  Донишгоҳи аграрии Тоҷикистон ба номи Шириншоҳ  Шоҳтемур ва ду нафар кормандони Маркази тадқиқоти стратегии назди Президенти Ҷумҳурии Тоҷикистон ҷиҳати баланд бардоштани савияи дониши касбии хонандагон дар муддати 10 рӯз давраи омӯзишӣ гузарониданд. Тавассути он иштирокдорон аз курси бозомӯзии «Фаъолияти китобдорӣ»  бархурдор гардиданд.
Зимни курси бозомӯзӣ шунавандаҳо тавассути лексия, шиносоӣ, вохӯриҳо бо масъулин ва мутахассисони соҳибтаҷрибаи Китобхонаи миллӣ бо дастовардҳои соҳаи  китобдорӣ дар Тоҷикистон ва ҷаҳон аз наздик воқиф гардиданд. Дар давоми 10 рӯзи баргузории курси бозомӯзӣ шунавандагон имкон пайдо карданд, ки аз таърих ва сохтори Китобхона, дастгоҳи маълумотдиҳандаи китоб ва тавлиди он, тарзи интихоби китоб ва иттилоот маълумот ба даст оранд ва аз таҷрибаи онҳо баҳрабардорӣ намоянд. Ҳамзамон дар бахши дигар оид ба истифодаи дастурҳои методӣ, библиографӣ дар пажӯҳиш ва интихоби адабиёт, иттилоот, таҳияи рӯйхати адабиёт, унсурҳо ва аломатҳои тасвир, таҳияи шарҳ ва мухтасари мазмуни китоб ё иттилоот, ташкили хазинаи китобхона, хазина ва сарчашмаҳои  иттилоотии  ҷудогона  дар китобхона ва вазифаҳои он, созмон додани  марказҳо ва хазинаҳои электронӣ дар китобхона, технологияҳои  иттилоотӣ, асосҳои коргузорӣ дар  китобхона ва ташаккули фарҳанги иттилооти  китобдорон маълумоти пурра ба даст оварданд.
Дар ҷамъбасти  курси бозомӯзӣ аз ҷониби  масъулини  Китобхонаи миллӣ ба ҳар як шунаванда  Сертификати тахассусии Маркази такмили ихтисоси Китобхонаи миллии Тоҷикистон супорида шуд.