ЛИБОСИ МАКТАБӢ: Мактабҳои шаҳри Ваҳдат бо коргоҳҳои дӯзандагии «Мафтуна», «Майрам» ва «Олимхони хуҷандӣ» шартнома ба имзо расониданд

ВАҲДАТ, 19.08.2017 /АМИТ «Ховар»/.  137 адад муассисаҳои таълимии шаҳри Ваҳдат  ҷиҳати бо либоси ягонаи мактабӣ таъмин намудани хонандагон бо  коргоҳҳои дӯзандагии «Мафтуна», «Майрам» ва ҶДММ «Олимхони хуҷандӣ» шартномаи тарафайн ба имзо расониданд. Тибқи иттилои мудири шуъбаи  иқтисод ва савдои шаҳри Ваҳдат Маҳмадбек Заробеков, дар асоси ин шартномаҳо аз ҷониби ин  коргоҳҳои дӯзндагӣ дар соли 2017  36 ҳазору 600 адад либоси мактабӣ дӯхта мешавад, ки нисбат ба соли 2016 8600 адад зиёд буда, таъмини либос 53,2 фоизро ташкил медиҳад.
Дар асоси маълумоти «Равзанаи  ягона»-и Нозироти андози шаҳри Ваҳдат, шумораи корхонаю коргоҳҳои дӯзандагӣ дар шаҳр 6 ададро ташкил дода, 28 нафар соҳибкорон тариқи патент ва шаҳодатнома ба кори дӯзандагӣ  машғул мебошанд. Дар коргоҳҳои дӯзандагии «Мафтуна» ва «Майрам» 55 нафар занону духтарон ба кори доимӣ ҷалб шудаанд.
Масъулини  Раёсати ҷамъияти матлуботи шаҳри Ваҳдат зикр намуданд, ки  барои сари вақт таъмин намудани мактаббачагон бо либос ва лавозимоти мактабӣ бо ҷалби соҳибкорон дар бозорҳои маркази ноҳия ярмаркаи доимӣ ташкил карда шудааст.