Маркази миллии тестӣ: пас аз имтиҳонҳои дохилшавӣ махзани бойи маълумот доир ба фанҳо ва дониши довталабон пайдо мегардад

ДУШАНБЕ, 5.07.2017 /АМИТ «Ховар»/. «Низоми Маркази миллии тестӣ имкон фароҳам овардааст, ки сатҳи дониши довталабон сол то сол боло равад». Ин нуктаро Сабзалӣ Ҷаъфаров, муовини аввали директори Маркази миллии тестии назди Президенти Ҷумҳурии Тоҷикистон зимни нишасти матбуотӣ бо доираи васеи хабарнигорон иброз намуд.

Номбурда гуфт, ки дар натиҷаи гузаронидани имтиҳонҳои дохилшавӣ як махзани бисёр бойи маълумот доир ба ҳар як фан ва дониши довталабон пайдо мегардад.

Ба таъкиди Сабзалӣ Ҷаъфаров, ҳамасола пас аз имтиҳонҳои марказонидаи дохилшавӣ (ИМД) таҳлилҳо гузаронида мешаванд, ки дониши донишҷӯён дар кадом сатҳ қарор дорад

«Дар ҳамкорӣ бо Вазорати маориф ва илми ҷумҳурӣ стратегияе пеш гирифта мешавад, ки сатҳи дониши донишҷӯён тадриҷан баланд бардошта шавад. Аз ин лиҳоз сол то сол саволҳо мушкилтар мегарданд, ки ин кор барои баланд бардоштани савияи дониши довталабон роҳандозӣ шудааст»,- гуфт муовини аввали директори Маркази миллии тестӣ.