Машғулиятҳои омӯзишии “Дойч Бундесбонк” барои кормандони Бонки миллии Тоҷикистон

ДУШАНБЕ, 23.08.2017 /АМИТ «Ховар»/. Дар Бонки миллии Тоҷикистон (БМТ)  дар ҳамкорӣ бо Маркази техникии “Дойч Бундесбонк” (Германия) барои кормандони дастгоҳи марказӣ ва шуъбаҳои минтақавии Бонки миллии Тоҷикистон  рӯзи дуюм аст, ки семинари омӯзишии «Раванди банақшагирии буҷет» ҷараён дорад. Дар  ин бора ба АМИТ «Ховар» аз Бонки миллии Тоҷикистон  хабар доданд.

Зикр гардид, ки семинар дар доираи ҳамкории Бонки миллии Тоҷикистон бо Маркази ҳамкории техникии “Дойч Бундесбонк”   бо мақсади баланд бардоштани маърифати касбии кормандони БМТ гузаронида мешавад.

Машғулиятҳо аз ҷониби мушовири калони  “Дойч Бундесбонк”   Кристоф Штута гузаронида шуда, тӯли ду рӯз иштирокдорон оид ба мавзӯъҳои «Ташкили кор ва вазифаҳои “Дойч Бундесбонк” ва ESCB  ва идоракунии корпоративӣ», «Пешбурд ва дар амал татбиқ намудани дурнамо барои соли 2020: натиҷагирии мувозинати холҳо, амалиёти SWOT (паҳлӯҳои қавӣ ва заифи имкониятҳо, хавфҳо)», «Идоракунии амалиётӣ, ҳисобу китоби арзиши аслӣ», «Баҳисобгирии хароҷот ва намудҳои хароҷот», «Банақшагирии буҷет, таҳлилу усули банақшагирӣ» маълумот гирифта, дониши худро сайқал медиҳанд.