Ниҳоди президентӣ дар таҷрибаи ҷаҳонӣ ва миллӣ

ДУШАНБЕ, 02.08.2017 /АМИТ «Ховар»/. «Ниҳоди президентӣ дар таҷрибаи ҷаҳонӣ ва миллӣ»- таҳти чунин унвон китоби докторанти риштаи ҳуқуқи Донишгоҳи давлатии тиҷорати Тоҷикистон Сиёвуш Наботов аз чоп баромад. Китоб ба таъсиси 25-солагии ниҳоди президентӣ дар Ҷумҳурии Тоҷикистон ва эълони Рӯзи Президенти Ҷумҳурии Тоҷикистон бахшида шуда, дар нашрияи «Империал- Групп» нашр шудааст.

Китоб ба таҳлили пайдоиши ниҳоди президентӣ ва умдатарин масъалаҳои ниҳоди мазкур дар асоси Конститутсияи Ҷумҳурии Тоҷикистон, санадҳои меъёрию ҳуқуқии кишварҳои хориҷӣ ва ватанӣ бахшида шудааст. Рисола бо назардошти қонунгузорӣ ва санадҳои байналмилалие, ки Тоҷикистон онҳоро эътироф намудааст, инчунин сарчашмаҳои илмию таълимии ватанию хориҷӣ таҳия шуда, аз ду боб:  «Ниҳоди президентӣ: назария ва амалия» ва «Ниҳоди президентӣ дар Ҷумҳурии Тоҷикистон», 6 банд: «Таъсиси ниҳоди президентӣ дар таҷрибаи ҷаҳонӣ», «Президент-Сарвари давлат ва ҳокимияти иҷроия», «Пайдоиши ниҳоди президентӣ дар Ҷумҳурии Тоҷикистон». «Шакли идораи давлатии Тоҷикистон-ҷумҳурии президентӣ», «Тартиби интихоби Президенти Ҷумҳурии Тоҷикистон», «Салоҳияти Президенти Ҷумҳурии Тоҷикистон»  ва замимаҳо иборат мебошад.

Рисолаи мазкур барои ҳуқуқшиносон, кормандони соҳаи илм, сиёсатшиносон ва хизматчиёни давлатӣ тавсия карда мешавад.