Нуробод: шумораи ҷамъиятҳо ва соҳибкорони инфиродӣ 122 адад зиёд гардидааст

НУРОБОД, 04.08.2017 /АМИТ «Ховар»/. Дар ноҳияи Нуробод шумораи ҷамъиятҳо ва соҳибкорони инфиродӣ  нисбат ба ҳамин давраи соли гузашта  122 адад зиёд гардидааст, ки онҳо дар  таъмини нақшаи  буҷети ноҳия саҳми намоён доранд. Ин нукта зимни нишасти матбуотии раиси ноҳия бо хабарнигорони воситаҳои ахбори омма баён гардид.

Раиси ноҳия Ҳасан Дӯстзода дар нишаст ҳамчунин иброз намуд, ки тибқи нақша барои корҳои сохтмону ободонӣ дар соли равон аз тамоми сарчашмаҳои маблағгузорӣ 27 миллиону 696 ҳазору 122 сомонӣ пешбинӣ шудааст. То имрӯз дар ноҳия бо мақсади  корҳои сохтмонӣ 6 миллиону 815 ҳазору 672 сомонӣ  аз ҳисоби  Муассисаи давлатии «Мудирияти минтақаи зериобшавандаи НБО-и Роғун», як миллиону 815 ҳазору 602 сомонӣ аз ҳисоби буҷети ҷумҳуриявӣ ва вазорату кумитаҳо ва 367 ҳазору 850 сомонӣ аз ҳисоби сармояи хориҷӣ аз худ гардидаанд.