Сафари нахустин гурӯҳи зоирони тоҷик ба Арабистони Саудӣ

ДУШАНБЕ, 16.08.2017 /АМИТ «Ховар»/. Нахустин  гурӯҳи шаҳрвандони Ҷумҳурии Тоҷикистон иборат аз 185 нафар  ҷиҳати тавофи хонаи Каъба субҳи имрӯз озими Арабистони Саудӣ гардиданд. Нахустин гурӯҳи зоирони тоҷикро  дар «Фурудгоҳи байналмилалии Душанбе» Сулаймон Давлатзода, раиси Кумитаи дин, танзими анъана ва ҷашну маросимҳои назди Ҳукумати Ҷумҳурии Тоҷикистон ва Абдулазиз ибни Муҳаммад Ал-Бодӣ, Сафири Шоҳигарии Арабистони Саудӣ дар Ҷумҳурии Тоҷикистон гусел карданд.

Бояд тазаккур дод, ки соли равон  6 ҳазору 400 нафар шаҳрвандони Ҷумҳурии Тоҷикистон маросими ҳаҷро, ки яке аз панҷ рукни муҳими дини Ислом аст,   ба ҷо меоранд.

Маросими гусели зоирини Ҷумҳурии Тоҷикистон  ба Арабистони Саудӣ то 26 август идома ёфта, сафари онҳо аз ҷониби ширкатҳои  миллии ҳавонавардии «Сомон Эйр»,  «Тоҷик Эйр» ва ширкати ҳавопаймоии  «ФлайНас»-и Арабистони Саудӣ анҷом дода мешавад.