САТРУ ҲИҶОБ, ҶИНСИ ТАНГУ ДАРИДА ВА ЮБКАИ КӮТОҲ НАПӮШЕД! Тавсияҳои Вазорати маориф ва илми Ҷумҳурии Тоҷикистон ба хонандагони муассисаҳои таълимии мамлакат

ДУШАНБЕ, 17.08.2017. /АМИТ «Ховар»/. Вазорати маориф ва илми Ҷумҳурии Тоҷикистон дар сомонаи расмии худ дастурамали либоси хонандагони мактабҳои таҳсилоти умумии кишварро интишор кард. Тибқи меъёрҳои дастурамали интишоршуда, ба духтарони мактабхон ҳангоми дар мактабҳо будан пӯшидани сатру ҳиҷоб, ҷинсҳои танг ва дарида, юбкаҳои кӯтоҳ ва танг, овехтани зиёда аз як гӯшвор дар гӯш, рангу бори аз меъёр зиёди рўю лабҳо ва абрӯвон манъ карда шудааст.

Ба писарон мондани ришу мӯи сар ва нохунҳои дароз, овехтани  гӯшвор ва ангуштарин манъ буда, пӯшидани шими ҷинс танҳо дар фасли зимистон иҷозат дода шудааст.

Ҳамчунин Вазорати маориф ва илми мамлакат ба хонандагон тавсия медиҳад, ки либоси аз матои сунъӣ (синтетикӣ) омодашударо ба бар накунанд. Ба духтарони мактабхон иҷозат дода мешавад, ки рӯймолҳо ва тоқиҳои миллӣ пӯшанд. Ба писарон ва духтарони мактабхон ҳангоми дар мактаб будан холкӯбӣ (татуировка — расму тасвирҳои дар дасту пой, рўю бадан гулкоришуда), пӯшидани футболкаҳо бо навиштаҷоти рекламавӣ ва рамзҳои давлатии кишварҳои дигар манъ мебошад.

Ба ҳамаи хонандагони мактабҳои таҳсилоти умумии кишвар пӯшидани либоси варзишӣ зимни машғулиятҳо, ба ғайр аз дарси  тарбияи ҷисмонӣ ва рӯзҳои ҳашар, манъ аст.

Дар рӯзҳои ид ба хонандагон тавсия дода мешавад, ки либоси расмӣ пӯшанд, барои писарон — костюмҳои сиёҳ ё кабуд, пойафзол бо чунин ранг, куртаи сафеди остиндароз ё остинкӯтоҳ, галстук,  барои духтарон –нимдоман (юбка) -ҳои сиёҳ ё кабуди аз зону поён, пойафзол бо чунин ранг,  куртаи сафеди остиндароз ё остинкӯтоҳ, галстук, ё шиму костюм. Духтарҳо метавонанд ҳамчунин либоси миллӣ ба бар кунанд.

Вазорати маориф ва илми ҶТ ҳамчунин тавсия медиҳад, ки либоси мактабӣ аз истеҳсолкунандагони ватанӣ харидорӣ шавад, вале ин кор маҷбурӣ нест.

Тавре ба хабарнигори АМИТ «Ховар» маълум гардид, ин танҳо тавсия аст, касе ҳақ надорад, ки волидонро барои харидории либоси мактабӣ аз ин ё он нуқтаи савдо маҷбур созад ва ё аз онҳо расиди харид талаб кунад. Агар либоси соли гузаштаи хонандагон  дар ҳолати хуб боқӣ монда бошад, метавонанд онро ба бар кунанд.