ТАҚВИМИ АМИТ «ХОВАР»: Имрӯз 16 август, чоршанбе, 228-умин рӯзи соли 2017 аст. То охири сол 137 рӯзи дигар боқӣ мондааст

Тақвими моро ҳар рӯз дар ин гӯша 

шореҳ Шукӯҳи ДАЛЕР варақ мезанад:

16 августи соли 2008 Президенти Ҷумҳурии Тоҷикистон, Пешвои миллат муҳтарам  Эмомалӣ Раҳмон Сафири  фавқулода ва мухтори Ҷумҳурии Федеративии Германия дар Тоҷикистон Райнер Мюллерро бинобар анҷом ёфтани муҳлати ваколати дипломатиаш дар кишвари мо ба ҳузур пазируфта буданд. Дар мулоқот масоили ҳамкории имрӯза ва ояндаи Тоҷикистону Германия баррасӣ шуданд. Сарвари давлат Эмомалӣ Раҳмон ба Райнер Мюллер барои фаъолияти босамари дипломатиаш дар Тоҷикистон ва ба Ҳукумати Ҷумҳурии Федеративии Германия барои кумакҳои беғаразона ва дастгирии пайваста, аз ҷумла баҳри маблағгузории лоиҳаи навсозии зеристгоҳи 220-киловолтаи барқтақсимкунӣ дар шаҳри Норак арзи сипос намуда буданд.

***

6 сол пеш,  16 августи соли 2011 дар шаҳри Хоруғ бо иштироки Президенти кишвар муҳтарам Эмомалӣ Раҳмон бинои нави Донишкадаи такмили ихтисоси омўзгорон ба номи Тутишо Назришоев, ки бо харҷи 2 миллион сомонӣ маблағҳои буҷетӣ бунёд ёфта буд, мавриди баҳрабардорӣ қарор гирифт.

***

16 августи соли 2013 дар шаҳри Душанбе Пешвои миллат муҳтарам Эмомалӣ Раҳмон муовини дабири кулли Созмони Милали Муттаҳид (СММ), муовини мудири Барномаи рушди СММ хонум Ребека Гринспанро, ки ба Тоҷикистон барои омодасозии Конфронси байналмилалии сатҳи баланд доир ба об ва иштирок дар он ташриф оварда буд, ба ҳузур пазируфтанд. Ребека Гринспан, аз ҷумла, изҳор дошта буд: «Мо пешсафию пешоҳангии Шумо, муҳтарам Президент ва кишвари шуморо дар татбиқи Ҳадафҳои рушди ҳазорсола бори дигар таъйид менамоем, зеро Шумо ва Ҷумҳурии Тоҷикистон дар воқеъ дар ҳалли масоили глобалии вобаста ба рушд, хусусан дар соҳаи об пешвоед».

 16 АВГУСТ ТАҶЛИЛ КАРДА МЕШАВАД:

Дар Парагвай –Рӯзи кӯдакон.

***

Дар Ҷумҳурии Доминикан – Рӯзи эҳёи ҷумҳурӣ.

 РӮЙДОДҲО:

16 августи соли 1857 дар Канада ба маҳбас кашидани қарздорон бекор карда шуд.

***

Зиёда аз як аср муқаддам, 16 августи соли 1906 дар натиҷаи заминҷунбӣ дар Чили зиёда аз  1 ҳазору 500 нафар ба ҳалокат расида, 100 ҳазор нафар бе сарпаноҳ монданд.

***

Дар ин рӯзи соли 1924 миёни Нидерландия ва  Туркия созишномаи сулҳ ба имзо расида буд.

***

16 августи соли 1936 дар шаҳри Берлини Олмон бозиҳои XI  тобистонаи олимпӣ ба анҷом расиданд.

***

16 августи соли 1960 Академияи байналмилалии кайҳоннавардӣ таъсис ёфтааст.

ИНЧУНИН ДАР ИН РӮЗ…

 Соли 1930 аввалин филми тасвирии овоздор ва ранга ба навор гирифта шудааст.

***

Соли 1998  дар Лондон аз ҳама калонтарин макарон истеҳсол шудааст, ки зиёда аз  270 килограмм вазн доштааст.