«Техникаи муосир – асоси пешрафти кор»: дар шаҳри Кӯлоб озмуни техникӣ доир гардид

КӮЛОБ, 5.08.2017 /АМИТ «Ховар»/.  Бахшида  ба Соли ҷавонон дар  Китобхонаи вилоятии шаҳри Кӯлоб зери унвони «Техникаи муосир –асоси пешрафти кор»  озмун  гузаронида шуд. Дар озмун хонандагони муассисаҳои таълимӣ  ва донишҷӯёни донишкадаҳои олӣ фаъолона ширкат  намуда,  маҳорати баланди эҷодӣ  ва дониши хуби  касбӣ-техникиашонро зимни  истифодаи дурусти компютер ва истифода аз шабакаҳои интернетӣ нишон доданд. Озмун нишон дод, ки  шавқу завқи хонандагон  нисбат ба истифодаи  технологияи муосири  компютерӣ  баланд буда, раванди бебозгашти  гузариш  ба ҷомеаи нави иттилоотӣ  имрӯз  яке аз масъалаҳои  муҳими пешрафти мамлакат гардидааст.

Тавре директори китобхона  Сайҳомид Обидов иттилоъ дод,  мақсади озмун аз равона намудани таваҷҷуҳи ҷавонони имрӯза  ба донишомӯзӣ, интихоби касбу ҳунар, ҳимояи ватан, рушди илму  технологияи муосир ва ба ин восита баланд бардоштани қобилияти эҷодии онҳо иборат буд.

Кормандони китобхона  тасмим гирифтаанд, ки  дар оянда оид ба технологияи иттилоотӣ  озмуну  викторинаҳои шавқовар ташкил намуда, омӯзиши  адабиёти илмии  техникиро  дар байни ҷавонон васеъ ба роҳ монанд.